មានបុរសម្នាក់ មានភរិយា ១ ប្រកបដោយរូបល្អប្រពៃបុរសនោះស្រឡាញ់ភរិយាអាត្មាហួសប្រមាណ មិនដែលទៅណាឲ្យឃ្លាតឆ្ងាយ ១ វេលាឡើយ មានថ្ងៃ ១ មានធុរៈទៅស្រុកឆ្ងាយនឹងខានមិនបាន បុរសនោះក៏យាត្រាទៅកាន់កន្លែងលក់បក្សី ហើយទិញសត្វសេក ១ យកមក ឯសេកនោះមិនគ្រាន់តែចេះនិយាយភាសាមនុស្ស ថែមទាំងមានប្រាជ្ញាវាងវៃចេះចាំរឿងរ៉ាវផ្សេងៗ ដែលបានដឹងបានឮនោះផង បុរសនោះយកសេកទៅដាក់ក្នុងទ្រុង ហើយនិយាយនឹងភរិយាអាត្មាឲ្យយកទៅដាក់ទុកក្នុងបន្ទប់ថែរក្សាឲ្យស្រួលល្អ ក្នុងពេលដែលខ្លួនមានដំណើរទៅនោះ ផ្ដាំស្រេចហើយក៏ដើរចេញទៅ ។
វេលាដែលត្រឡប់មកដល់ផ្ទះវិញ ចូលទៅពិចារណាសួរសេកនោះ អំពីហេតុភេទដែលកើតឡើងក្នុងគ្រាដែលខ្លួនមិននៅ សត្វសេកឆ្លើយប្រាប់អស់កិច្ចការដែលនាំឲ្យស្វាមីស្ដីបន្ទោសជាទំងន់ដល់ភរិយា ។ នាងនោះគិតស្មានថាមានទាសីណាក្នុងផ្ទះលួចប្រាប់រឿងរាវនេះ ក៏ហ៊ានស្បថស្បែឲ្យប្ដីថា ខ្លួនមានចិត្តស្លូតត្រង់ឥតមានល្អៀងប្រែប្រួលទេ វេលាក្រោយមកនាងនោះបានដឹងថារឿងរ៉ាវទាំងប៉ុន្មានបែកពីសត្វសេកនិយាយប្រាប់ស្វាមី ។
លុះដឹងដូច្នោះហើយ ក៏គិតតែក្នុងចិត្តរកឧបាយនឹងបំបាត់សេចក្ដីសង្ស័យរបស់ស្វាមីខ្លួនផង នឹងញាំងសេកនោះឲ្យវិនាសផង ត្រេះរិះមកទាន់បានប៉ុន្មានឃើញឧបាយដូចមានខាងក្រោយ ថ្ងៃ ១ ស្វាម៉ីមានដំណើរទៅឆ្ងាយកំណត់ ១ ថ្ងៃយប់នោះនាងប្រើទាសីម្នាក់ឲ្យយករហាត់ទៅរវៃនៅក្រោមទ្រុងសេក ទាសីម្នាក់ទៀតឲ្យយកទឹកទៅសាចពីលើដម្បូលទ្រុងធ្វើដូចជាភ្លៀង ឯទាសីម្នាក់ទៀតឲ្យយកកញ្ចក់ទៅឆ្លុះបញ្ចាំងដោយពន្លឺទៀន ឆ្លុះពីខាងឆ្វេងម្ដងពីខាងស្ដាំម្ដង រីបាវព្រាវទាំងប៉ុន្មាននោះក៏ទៅធ្វើតាមមុខក្រសួងតែរៀងខ្លួន តាំងពីក្បាលព្រលប់លុះដល់យប់ជ្រៅទើបឈប់ ។
វេលាថ្ងៃស្អែកឡើងប្ដីត្រឡប់មកវិញ ក៏ទៅពិចារណាសួរសេកទៀត អំពីហេតុកើតឡើងក្នុងផ្ទះ ឯសេកតបវិញថា ឱម្ចាស់ខ្ញុំអើយ ក្នុងវេលាយប់មិញនេះរន្ទះផ្គរផ្លៀងធ្វើទុកខ្ញុំទើសភ្លឺខ្ញុំបានសេចក្ដីលំបាកឥតឧបមា បុរសនោះបានដឹងប្រាកដថាក្នុងវេលាយប់នោះឥតមានផ្លៀងផ្គរសោះ នូវវេលាដែលបានឮសេកនិយាយប្រាប់ដូច្នោះ ក៏គិតថាសេកនិយាយពាក្យមុសាវាទ ដូចជាពាក្យដែលប្រាប់កាលជាន់មុន អំពីកិរិយាមារយាទភរិយាខ្លួន ក៏សុទ្ធតែជាពាក្យពោលបង្កាច់ ជាពាក្យកុហកមិនពិតទាំងអស់ដែរ គិតដូច្នេះហើយ ក៏ទាញយកសេកពីទ្រុងបោកផ្ទប់ទៅលើដីដល់អន្តរាយជីវិតក្នុងគ្រានោះទៅលុះដល់ថ្ងៃក្រោយមកទើបបានដឹងហេតុជាប្រាកដអំពីអ្នកជិតខាង ថាសត្វសេកនោះមិនបានពោលពាក្យកុហកបង្កាច់កិរិយាមារយាទភរិយាខ្លួនទេ បុរសម្ចាស់សេកដឹងហើយកើតសេចក្ដីសោកស្ដាយសត្វបក្សីមហិមា ព្រោះខ្លួនបានពិឃាតចោលដោយឥតពិចារណា ។
វេលាដែលបានសារស័ព្ទរឿងប្រាប់ អគ្គសេនាបតិដូច្នោះហើយ ស្ដេចក៏មានព្រះបន្ទូលតទៅទៀតថា ម្នាលអគ្គមហាសេនា ខ្លួនឯងនេះច្បាស់ជាមានសេចក្ដីច្រណែនឫស្យាដល់ពេទ្យឌូប័នដែលជាមនុស្សសុចរិត ឥតធ្វើអំពើអាក្រក់អ្វីដល់ឯងសោះ ម្ដេចក៏ឯងមកពោលបង្កាច់ឲ្យអញសំឡាប់វាដូច្នេះ អញនឹងតាមពាក្យឯងឯណាបាន ព្រោះអញខ្លាចមានសេចក្ដីស្ដាយទៅឯក្រោយ ដូចយ៉ាងបុរសសំឡាប់សេកនោះឯង ឯអគ្គមហាសេនាដោយប្រាថ្នាចង់ឲ្យពេទ្យឌូប័នបានសេចក្ដីអន្តរាយណាស់ ក៏ខំចចេសួររករឿងទូលតទៅទៀតថា បពិត្រព្រះករុណាជាអម្ចាស់ សូមព្រះអង្គជ្រាបថាជីវិតសត្វសេកដែលបាត់បង់ទៅនោះមិនជាថ្លៃថ្លាប៉ុន្មានទេ ទូលព្រះបង្គំជាខ្ញុំស្មានថាបុរសជាម្ចាស់សត្វនោះក៏មិនបានសោកស្ដាយជាយូរអង្វែងដែរ ដូចជាព្រះអង្គក៏មិនគួរនឹងស្ដាយថាក្រែងពេទ្យនោះជាមនុស្សនិរទោស តើសេចក្ដីដែលថាពេទ្យនេះមានប្រាថ្នានឹងធ្វើជីវិតព្រះអង្គឲ្យអន្តរាយ នៅមិនទាន់ធួនល្មមនឹងបំបាត់ជីវិតវាឬ ? ចំណែកទូលព្រះបង្គំជាខ្ញុំយល់ថាកិរិយាដែលរក្សាអង្គមហាក្សត្រនិមួយៗ ឲ្យបានសុខស្រួល កុំឲ្យមានសត្រូវណាមកបៀតបៀនបាន នោះគួរណាស់តែយកហេតុដែលនាំឲ្យមានមន្ទិលសង្ស័យបន្តិចបន្តួចមកទុកជាការពិតការមែនបានគឺថាសូវសំឡាប់មនុស្សឥតទោសជាជាងសង្រ្គោះមនុស្សមានទោស បពិត្រព្រះសមតិទេវាវង្ស រឿងដែលទូលព្រះបង្គំជាខ្ញុំនាំមកក្រាបទុលនេះ មិនមែនជារឿងមិនពិតទេ គ្រូពេទ្យឌូប័ននេះប្រុងនឹងប្រហារជីវិតព្រះអង្គដោយជាក់ស្ដែងណាស់ទូលព្រះបង្គំជាខ្ញុំ មិនមែនក្លែងបង្កាច់ដោយសេចក្ដីច្រណែនឈ្នានិះឡើយ គឺទូលដោយត្រង់ ព្រោះចង់ឲ្យគង់ជីវិតព្រះអង្គតទៅមុខ ប្រសិនបើពាក្យដែលទូលព្រះបង្គំក្រាបទូលនេះ ជាពាក្យក្លែង សូមឲ្យព្រះអង្គប្តន្ទាទូលព្រះបង្គំជាខ្ញុំដូចជាស្ដេច ១ អង្គប្តន្ទាមហាមាត្យម្នាក់ក្នុងរឿងដែលមានពីបុរាណមក ។ គ្រានោះស្ដេចក្រិកសួរទៅវិញថា ចុះមហាមាត្យក្នុងរឿងនោះបានប្រព្រឹត្តដូចម្ដេចក៏បានជាត្រូវទណ្ឌកម្ម អគ្គមហាសេនាទូលថា សូមព្រះអង្គទ្រង់ព្រះសណ្ដាប់ចុះ ទូលព្រះបង្គំជាខ្ញុំនឹងនាំមកនិទាន រឿង មហាមាត្យត្រូវទណ្ឌកម្ម។
ដកស្រង់ចេញពីៈ កម្ពុជសូរិយា
នាំមកជូនដោយៈ THE KHMER SPOT
THE KHMER SPOT 